મહામહોપાધ્યાય પ.પૂ. યશોવિજયજી મ. સાહેબ પ્રણીત ‘અધ્યાત્મસાર’ ગ્રન્થનો ‘ભાવાનુવાદ’ વાંચતા મોક્ષલક્ષી આત્મા ‘આનંદાનુભૂતિ’ કર્યા વિના ન જ રહે. આ ગ્રન્થમાં કુલ ૨૧ વિષયો છે. કુલ ૯૪૯ શ્લોકો છે. સંસ્કૃત ભાષા નહિ જાણનાર પણ આ અદ્‌ભુત ગ્રન્થનો અવબોધ કરી શકે તે માટે નિષ્કામ કરૂણાશીલ પૂ. ગુરૂમાતાએ ખૂબ જ મહેનત કરીને ગુજરાતીમાં આ ગ્રન્થનો સુંદર ભાવાનુવાદ કર્યો છે. આ ગ્રન્થના કેટલાક કઠણ શ્લોકોનો અર્થ પૂ. ગુરૂમાતાએ પોતાના પૂ. ગુરૂદેવનો માત્ર હાથ ઝાલતાં હૈયામાં સ્થિર કર્યો છે. તે ઉપરથી આ પુસ્તકના ભાવાનુવાદકર્તાનો પોતાના ગુરૂ ઉપરનો ઝળહળતો ભક્તિભાવ જણાયા વિના નહિ જ રહે. પૃ. ૪૧ ઉપર ‘દમ્ભત્યાગ’ અધિકારના વીસમા શ્લોકમાં જણાવ્યું છે કે, ‘‘જિનેશ્વર ભગવાનની એક જ આજ્ઞા છે કે વિહિત બધું કરો, નિષિદ્ધ બધું ત્યાગો પણ દંભમુક્ત બનીને જ. દંભત્યાગ જ સર્વ પ્રથમ અને સદાનું કર્તવ્ય બની રહે છે.’’ આ વાંચીને ડબલ રોલમાં જીવન જીવનાર (ભવભીરૂ હશે તો) ચેતી ગયા વિના નહિ જ રહે. ‘ભવસ્વરૂપચિન્તા’ અધિકારમાં સોહામણા દેખાતા આ સંસારની અત્યંત કુરૂપતા પૂજ્યશ્રીએ જે લાગણીશીલ શૈલીમાં વર્ણવી છે તે વાંચતાં ‘સંસારરાગ’ ઓછો થયા વિના ન રહે. ટૂંકમાં આ ગ્રન્થના કેટલાક શ્લોકોનો અર્થ જો સતત નજર સમક્ષ રહે તો આવતા ભવે શ્રી સીમંધરસ્વામીના હાથે દીક્ષા અને કેવળજ્ઞાનની પ્રાપ્તિ અશક્ય બાબત ન લાગી શકે.